လိက်အုပ်ဗဂဵုလဟဵုဘဝ ကေုာံ ၚုဟ်မးမၞိဟ် လိက်အုပ်ဝွံမၞုံယၟု '''(မၞိဟ်ဆာန်ကမၠောန်)'''
ပွမကၠောန်ကမၠောန်ဟီုမ္ဂးဂှ်တှ်ေ ဒှ်တဴၚုဟ်မးဇၞော်အိုတ်သွက်ဘဝမွဲနကဵုဂၠံင်ဍာန်တပ်အးမၞုံကဵုဓရ်၊
'''ကမၠောန်ဟီုမ္ဂးဂှ်ဘဝ ဘဝဂှ်လေဝ်ကမၠောန်'''မွဲတုဲ ဗစိုပ်ဏာကဵုပိုဲတံဂွံဆဵုတသိုက်ရ၊ ကၠောန်ကမၠောန်ကဵုမိပ် မိပ်ညိအဴပ္ဍဲအရာကၠောန်ကမၠောန်။
စလုပ်ဗှ်ဖျုန်လိက်အုပ်အိုတ်စိုအ် −− '''(မၞိဟ်ဆာန်ကမၠောန်)'''
'''(ပွမကၠောန်ကမၠောန်ဟီုမ္ဂးဂှ် ဒှ်တဴၚုဟ်မဇၞော်အိုတ်သွက်ဘဝ)'''
ကဵုဂွံဍိုက်ပေင်ကဵုဓရ်သီုကဵုညးဖ္အိုတ်ညိအဴကောန်ဂကူမန်တံ၊ ပရင်တဲဏံမွဲပိုဒ်ဍောတ်ဝွံ ဟီုလဴစိုပ်အာဓရ်ညိညအရာသုင်စောဲဘဝပ္ဍဲအရာမကၠောန်ကမၠောန်ခိုဟ်မွဲတုဲ ဂွံကတဵုဒှ်အရာမိပ်မိပ်မွဲတုဲ ဂွံဗဒှ်ကဵုတသိုက်စိုတ်မာန်ရ၊ ပိုဲတံညးဂမၠိုင် ပွမဒးကၠောန်တဴကမၠောန်ဟီုမ္ဂးဂှ်တှ်ေ သွက်သ္ဂောံဂွံမင်မွဲလွဳပရာအာဘဝပိုဲတံသီုညးဖ္အိုတ်မာန်တုဲ ညံင်ဟွံဂွံဒးဒှ်ဒဒိုက်စိုတ်ပ္ဍဲအရာအဃောကၠောန်တဴဒၟံင်ကမၠောန်ဂှ်မာန်ရ။
'''(ဘဝမၞိဟ်ကၠောန်ကမၠောန်)'''
ဘဝမၞိဟ်မကၠောန်ကမၠောန်တံဂှ် ဟွံတန်ဒှ်ကဵုကမၠောန်ဂှ်မိပ်တုဲမှဒးကၠောန်အာ၊ ယဝ်ရကမၠောန်ပိုဲတံဟွံဒးစိုတ်တုဲကၠောန်ဗက်ဟေၚ် ခန္ဓကာယပိုဲဏံဂှ်လေဝ် ဗဒှ်ကဵုဒဒိုက်မာန်လောဲလောဲရ။
မၞိဟ်မိပ်ကဵုကမၠောန်တံဂှ် ဟွံသေင်ကဵုကမၠောန်ဂှ်မိပ်တုဲမှဒးကၠောန်အာရ၊ ဟိုတ်ဒှ်သာ်ဂှ်တုဲ ပိုဲတံထေက်ဒးမိပ်ကဵုကမၠောန်ဂှ်တုဲ ပိုဲတံဒးဗက်ဗပေင်ဍေံညံင်ဂွံမိပ်တုဲ သိုၚ်ဗဒှ်စိုတ်ပိုဲဏံ ဂွံတီတာလျိုင်မၞိဟ်မွဲသိုၚ်ဗဒှ်ဖန်ကေတ်ဍေံ ညံင်ကဵုကမၠောန်ဂှ်ဂွံမိပ်တိုန်မာန်မဒှ်ရ။
'''မိက်သ္ဂောံလဴမအရေဝ်အဲဂွံဗှ်ကေတ်နင်နူလိက်မွဲအုပ်ဂှ်တှ်ေ''' −−− ပွမကၠောန်ကမၠောန်ဟီုဂှ် ယဝ်ရတ္ၚံက်မံင်ကဵုညးတၞဟ်သၟး ပၠံင်ကေတ်က္ဆံင်ညးလ္တူအဲ−အဲလ္တူညးပၠန်၊ လ္ၚဵုဂှ်လေဝ် ပွမဟီုဂး ပါရမဳသဝ်သၠုင်သဝ်ညးသ္ကံဂှ်ကီုမ္ဂးတှ်ေ ဂွံဆဵုတဴတသိုက်စိုတ်ပ္ဍဲအရာကၠောန်ကမၠောန်ဟွံမွယ်တုဲ ကၠောန်အာကမၠောန်မွဲစွံညးသ္ကံဂှ်လေဝ် ဟွံမိပ်တဴညးသ္ကံအိုတ်ရ။
ပ္ဍဲကဵုအခိင်အခေတ်လၟုဟ်တ္ၚဲဏံဂှ်တှ်ေ လပါ်ကမၠောန်ဂှ်အဓိကဟွံဇၞော်စကွေံတုဲ ဒှ်အဓိကဇၞော်တဴလပါ်စိုတ်ဓါတ်မဒှ်ရ၊ ထေက်ကဵုပိုဲတံဒးပလံင်ဏာစိုတ်ပိုဲတံညံင်သ္ဂောံမိပ်ကဵုကမၠောန်ဂှ်မာန်ညိ၊ ယဝ်ရကမၠောန်မိပ်တုဲ ပိုဲတံဒးမိပ်အာလေဝ်ဟွံသေင်ပုဟ်၊ ဟိုတ်ဒှ်သာ်ဂှ်တုဲ ကၠောန်ကမၠောန်ဂွံမိပ်ဟီုဂှ်ဟွံဆေင်စပ်ကဵုကမၠောန်ဂှ်ရ၊ ဍေံဆေင်စပ်မံင်ကဵုစိုတ်ဓါတ်ပိုဲဏံသက်သက်ရ။
'''(ဒှ်အသိုက်အဃောကၠောန်တဴကမၠောန်ဂှ် မၞုံတဴ(၃)ပွမရံင်)'''
'''၁ ၊ ရံင်ကမၠောန်'''
ပ္ဍဲကဵုဖဵုပွမရံင်ကမၠောန်ဏံတှ်ေ ပိုဲတံဒးရံင်အာကမၠောတ်ပိုဲတံမကၠောန်ဒၟံင်ဂှ်ကၠာညိ၊ ပိုဲတံဒးရံင်တဴကမၠောန်ဏံဂှ် ဒှ်တဴၚုဟ်မးဇၞော်အိုတ်သွက်ဘဝမွဲတုဲ ကမၠောန်ဏံမွဲဟေင်ရဍေံတံင်ဂြဲဏာဘဝပိုဲမၞိဟ်တံသွက်အနာဂတ်တေံ ဇၟာပ်ဘဝဂျိုင်တံဒၟံင်လ္တူလိုက်ဏံဖ္အိုတ်မာန်ရ၊ သတ်နွံကဵုလမျီုဂွံဂျိုင်အာမာန်ဂှ်နကဵုကမၠောန်သီုဖ္အိုတ်ရ၊ ယဝ်ရကမၠောန်ဟွံမွယ်ဟွံကၠောတ်တဴကမၠောန်မ္ဂးတှ်ေ ဒးချိုတ်အာဖ္အိုတ်မာန်ရ။
ယဝ်ရမိမပိုဲညးတံဟွံကၠောန်တဴကမၠောန်လွဳပရာလဝ်ပိုဲမ္ဂးတှ်ေ ပိုဲတံအခေါင်ဟွံမွယ်ဂွံဂျိုင်တိုန်အဝယ်ဏံမာန်ရ၊ ဣဏံဟေင်ရရိုဟ်ကၞက်သဇိုင်ဘဝဂွံဂျိုင်အာနကဵုကမၠောန်။
'''၁ ၊ ရံင်ဇကုပိုဲ'''
ပ္ဍဲဖဵုၜါဏံတှ်ေ ကၠုင်လ္ၚတ်ရံင်ဇကုပိုဲဏံပၠန်ညိအဴ၊ ခန္ဓကာယပိုဲမၞိဟ်ဏံဂှ်လေဝ် ဒးကၠောန်ဒၟံင်ကမၠောန်အလုံခန္ဓပိုဲဏံမာန်လၟိုန်ရ၊ မတ်ၜါမကၠောန်ကမၠောန်ပွမရံၚ်ဆဵုညာတ်၊ ကတောဝ်ၜါလ္ပါ်ဂှ်ပၠန်လေဝ် ဒးကၠောန်ကမၠောန်ပွမကလၚ်၊ မုဟ်ဏံဂှ်ပၠန် ကၠောန်ကမၠောန်ပွယယီုကျာလုပ်တိတ်ရ၊ ယဝ်မုဟ်ဂှ်ဍေံဟီု ဒးဒိုအ်ဇူထောံၜိုတ်ကွက်နာဍဳဟွံကၠောန်ကမၠောန်တှ်ေ အလုံခန္ဓကာယပိုဲဏံအိုတ်သီုတံဂှ် ဂွံတီကေတ်ကြေပ်ဂြတ်တဴဗွဲမလောန်ရ။
ပ္ဍဲကဵုခန္ဓကာယပိုဲမၞိဟ်ဏံသီုဖ္အိုတ်ဂွံဂျိုၚ်အာမာန်ဂှ် ဟိုတ်နူကဵုအလုံခန္ဓဏံမွဲဂှ်ကၠောန်ဒၟံၚ်ကမၠောန်ရ၊ ဟိုတ်ဒှ်သာ်ဂှ်တုဲ ယဝ်ရခန္ဓဏံကၠောန်ကမၠောန်အိၚ်လဇုဲအာတှ်ေ ညးတၠခန္ဓကာယပိုဲဏံဂှ်လေဝ် တီကၠိုဟ်ကေတ်ဟွံဂွံတဴတသိုက်ရ၊ ဆီ ကျာတံဂှ်လေဝ်ဟွံကၠောန်တဴကမၠောန်တှ်ေ လတေင်ဆီဇုတ်နာနာတံဂှ်လေဝ်ဟွံကၠောန်တဴကမၠောန်အိုတ်မာန်ကီု ဇိုင်တဲပိုဲတံဟွံချဳလဝိင်အာလဝိင်ကၠုင်တှ်ေ ဂွံတီကေတ်ဂှ် အလုံမွဲခန္ဓကာယပိုဲဏံဟွံဂွံစတသိုက်ကွေံကွေံတုဲ ခြာဟွံလအ်ဟေင်ဒးချိုတ်မာမာန်ရ၊ ဟိုတ်ဒှ်သာ်ဂှ်တုဲ ကမၠောန်ဟီုဂှ်ဒှ်ၚုဟ်မးသ္ကးဇ္ၚးဂၠင်တရဴသွက်ဘဝပိုဲဏံဇေတ်ဇေတ်ရ။
နူစဖဵုဏံပေတိုန်အာမွဲကဆံင်ဂှ်ပၠန်ဟီုဂှ်တှ်ေ ကမၠောန်ဟီုမ္ဂးဂှ် ဒှ်ညးတၠကၠေင်က္ဍဟ်မွဲခိုဟ်အိုတ်သွက်ဘဝပိုဲဏံမာန်ရ၊ တၠပညာအ္စာသိပ္ပံတံမဟီုလဝ်ဂှ် '''ကသပ်လညာတ်ညာဏ်တံဂှ် ဍေံက္တဵုဒှ်ကၠုင်နူကဵုပိုဲတံသုင်စောဲစကာတဴကမၠောန်မွဲရ၊'''
ပိုဲမိက်သ္ဂေံာတီညးလဵုမွဲပြသၞာနွံဟွံမွယ်တှ်ေ ဒးရံင်ဍေံတံကၠောန်ကမၠောန်ညိ၊ ယဝ်ရဍေံကၠောန်ကမၠောန်တုဲဒှ်ချိုတ်ပၠိုတ် ကၠောန်ကမၠောန်ပြဟ်ပြေဟ်သာဍာ၊ စောန်ပ္ဍဲအရာကၠောန်ကမၠောန်ဍေံမကၠောန်၊ သှ်ပလးပ္တိတ်အခက်ခုဲပြသၞာဒၞာဲဂတမုက်ကမၠောန်မာန်လောဲလောဲတုဲ မၞိဟ်ဗီုတံဏံဟီုဂှ် ဒှ်မၞိဟ်စောန်ကသပ် စောန်လညာတ် စောန်ပညာ စောန်ကမၠောန်မွဲရ။
ဗဟုသုတဟီုဂှ် က္တဵုဒှ်ကၠုင်ၜါနဲကဲမာန်ရ၊ နဲကၠာဂှ် ဒှ်ကၠုင်နူကဵုပိုဲတံပွမဗ္တောန်ကေတ်ဍေံ ကၠုင်နူဘာတန်ဗွဲတုန်၊ မွဲနဲဂှ်ပၠန်တှ်ေ က္တဵုဒှ်မံက်တိတ်ကၠုင်ပရေင်ဆဵုဂဗကီု ဗဟုသုတမဂွံနင်နူကဵုပွမကလင်လဝ်ဂှ် ဟွံခိုဟ်အာနူကဵုဗဟုသုတပိုဲတံစကၠောန်ကမၠောန်သ္ပဗဒှ်ကေတ်ဍေံဇေတ်ဇေတ်ရ။
'''(ပွမကၠောန်ကမၠောန်ဟီုဂှ် ဒှ်တံၚုဟ်မးဇၞော်အိုတ်သွက်ဘဝမွဲ)'''
ရံင်အာမွဲလပါ်ပၠန်ဂှ်လေဝ် ကမၠောန်ဂှ်ဒှ်တဴညးတၠဂုဏ်ဖဵု ဒှ်တဴညးတၠလာပ်ဗဇဴ ဒှ်တဴညးတၠကုသဵုမွဲပေင်ပေင်ရ။
ဨနဲဏံမွဲနဲဟေင်ရပိုဲမၞိဟ်တံဒးဂၞပ်စိုတ်ကေတ်ဍေံကွေံကွေံရ၊ အနာဂတ်တိုင်ပ္ကဴဘဝဂှ်လေဝ်ကၠုင်နူကဵုကမၠောန်မွဲ ကၠုင်နူဍာ်ပလက်ပိုဲမကၠောန်တဴကမၠောန်၊ ဒၞာဲဏံဝွံ ပိုဲတံဒးရံင်ကေတ်ဍေံသၠုင်သၠုင်ညိ၊ ရံင်ကဵုဒှ်ဗဵုကဵုလေပ်ဟီုဂှ်တှ်ေ ကၠောန်ကမၠောန်ဟီုဂှ် ခိုဟ်နူကဵုဍာ်မ္ၚဵုပိုဲတံကလအ်ပူဇဴဒၟံင်တ္ၚဲဏံဏီရ၊ ပလက်ပိုဲမပြဟ်တိတ်ကၠုင်နူကဵုပွမကၠောန်ကမၠောန်ဏံပၠန်လေတ် ပြဳတဴလောန်နူကဵုဍာ်မ္ၚဵုဘာလကျာ်မြဟ်မြဟ်တံဂၠိုင်ကဵုဆဏီရ။
မၞိဟ်အောန်ကဵုပညာကသပ်လညာတ်သဝ်သဝ်တံဂှ် ပတှ်ေတဴကုသဵုဇာတာမွဲသာ်အိုတ်ရ၊ မၞိဟ်တၠပညာတံဂှ်လေဝ် ဍာ်ပလက်ပိုဲဏံမကၠောန်ကမၠောန်ဟေင်ရခိုဟ်နူကဵုဍာ်မ္ၚဵုတံဏီဏောၚ်၊ မ္ၚဵုဖဵုခိုဟ်အရာမွဲမွဲဂွံကတဵုဒှ်ကၠုင်ပ္ဍဲဘဝပိုဲဏံမာန် ကၠောန်ဗဒှ်ကဵုပိုဲဂွံဒှ်တသိုက်ဂွံစိုပ်အာတိုၚ်ပ္ကဴဘဝ ဂွံပတိုန်ကေတ်ကဆံင်ယၟုယၟာဒယှ်တှ်သီုဖ္အိုတ်တံဂှ် ဇေတ်ဇေတ်ဂှ်တှ်ေဍေံကၠုင်နူကဵုပိုဲတံပွမကၠောန်ကမၠောန်ရ။
ပိုဲတံဂွံဆဵုကေတ်ကၠးကၠးဟီုဂှ် '''ကမၠောန်'''ဏံမွဲဟေင်ရသိုၚ်ပ္တိုန်ကဵုၚုဟ်မးပိုဲမၞိဟ်တံသီုညးဖ္အိုတ်ရ၊ ဟိုတ်ဒှ်သာ်ဂှ်တုဲ ကံဇာတာကုသဵခိုဟ်ပရေံတံဂှ်လေဝ် ဍေံနွံဒၟံၚ်ပ္ဍဲကဵုဍာ်ပလက်ကမၠောန်ပိုဲဏံရ၊ ဟိုတ်ဂှ်ရ ပိုဲကောန်ဂကူတံသီုညးဖ္အိုတ်လေဝ် ထေက်ကြိုက်ရံင်ဗဵုကဵုလေပ် ရံင်ကဵုဂွံဆဵုကေတ်ကၠးကၠးဂှ်တှ်ေ '''ကမၠောန်ကဵုဘဝ'''ပိုဲဏံမွဲဂှ် ဒှ်တဴမွဲဆီမွဲပတိုဟ်ပါ်ပဲါပ္တိတ်ထောံညးသ္ကံဟွံဂွံရ။
'''မၞိဟ်ဆာန်ကမၠောန်'''
ပေတိုန်မွဲကဆံၚ်ပၠန်ဟီုဂှ်တှ်ေ ညးလဵုမွဲစိုတ်ညိင်ကဵုကမၠောန် ဆာန်ကမၠောန် ဒးစိုတ်ကၠောန်ကမၠောန်တံဂှ် စိုတ်ညးတံပဲါစ္ဍးတိတ်အာနူကဵုကမၠောန်ဟွံခိုဟ်ဟွံဒှ်ဖဵုတံနာနာသာ်မာန်ရ၊ မၞိဟ်ဆာန်ကမၠောန်ဏံဂှ် ညးတံအာကေတ်အခိင်ဒၞာဲလဵုဂွံအာဝေင်မိပ်အရာဟွံမွယ်ကဵုဖဵုတံဂှ်မာန်ရော၊ ဂၠာဲအခိင်ဒၞာဲလဵုဂွံအာသုၚ်အရက်သုင်ဂဥုဲဗ္ၜူဗ္ၜူတံဂှ်ရော၊ ညးတံဂွိင်ဖေက်အခိင်ဂှ်အိုတ်အာတုဲ ညးတံဂှ်လေဝ်ဟွံကွာ်လုပ်အာပ္ဍဲကဵုကတိုၚ်ဂၟက်ဂၠိဂၠိတံဂှ်တွဵုရ။
မၞိဟ်စိုတ်ဆာန်ကမၠောန်တံဂှ် အရာဟွံဒှ်ဖဵုခိုဟ်မွဲဂှ်ညးတံဟွံချပ်တုဲမှကွာအာကၠောန်အာရ၊ ဂွိင်ဖေက်အခိင်ဂှ်အိုတ်ဒှ်အာမးမးတုဲ ဇူဒီုပကောံဒြဟတ်တှ်ေခိုဟ်တဴလောန် တ္ၚဲယျးတေံသွက်သ္ဂောံဆက်ကေတ်တာလျိုင်ကၠောန်ကမၠောန်လၟေင်လၟေင်တ္ၚဲဂှ်ပၠန်ရ၊ မၞိဟ်သာ်တံဏံဂှ် စိုတ်ညးတံအာစောဲနွံဒၟံင်ကဵုပ္ဍဲကမၠောန်ဒၞာဲဒှ်ဖဵုတံတွဵု။
မၞိဟ်ဆာန်ကမၠောန်တံဂှ် ဟွံဒးစိုတ်ညးကွာ်ဂၠံင်တ္ၚံက်တ္ၚံက်တံဂှ်ရ၊ မိတ်သဟာပရေံပရေံတံဂှ်ပၠန်လေဝ် ညးတံပဲါတိတ်ထောံသ္ၚောဲသ္ၚောဲရ၊ မၞိဟ်ဆာန်ကမၠောန်တုပ်မှညးတံပံင်ဖက်ဆက်ဆောံတဴညးသ္ကံအိုတ်ရ၊ ညးတံတက်ကျာညးသ္ကံလေဝ်အရာဆေင်စပ်ကဵုကမၠောန် ဟိုတ်ဒှ်သာ်ဂှ်တုဲ မၞိဟ်ဒးစိုတ်ကမၠောန်ဆာန်ကမၠောန်တံဂှ်ညးတံပံင်တဴမွဲဂကောံမွဲကရောံသွက်မၞိဟ်ဆာန်ကမၠောန်ရ။
မၞိဟ်ဆာန်ကမၠောန်တံဂှ် စိုတ်ဓါတ်ညးကဆံၚ်ဟွံသဝ်အာတုဲ ဇၟာပ်ဇၟာပ်အခိင်ညးတံကူချပ်ပါ်ပဲါဗ္စာရဏာအရာဂွံဒှ်ဖဵုသွက်ဘဝ ညးတံဒးဍောင် သွက်သ္ဂောံဂွံဖဵုပ္ဍဲတ္ၚဲဂတတေံလၟိုန်ရ။
'''မၞိဟ်တ္ၚအ်ဇိုင်တဲသာဍာတံဂှ်ထေက်ကြိုက်ဒှ်တသိုက်'''
ညံင်ရဴသာဝွံကီု −−− '''(မၞိဟ်တ္ၚအ်ဂှ်ထေက်ကြိုက်ဒှ်တသိုက်၊ သွက်မၞိဟ်အိက်လၞုဟ်တံဂှ် ထေက်ကြိုက်ဒးဆဵုဒဒိုက်ပေင်ပေင်)'''
မၞိဟ်ဟွံဆာန်ကမၠောန်တံဂှ် ဒှ်တဴမၞိဟ်အိုတ်ပိုတ်ကၠုင်ဖဵုနာနာလ္တူလိုက်လောကဏံသီုကဵုဓရတုဲ ဟွံမွယ်ကဵုလျးအရံင်မၞိဟ်မွဲမာန်ရ။
မၞိဟ်လဵုမွဲဟွံတီၚုဟ်မးကမၠောန်ဆေင်စပ်မံင်ကဵုဘဝတံဂှ် ညးကော်ခဴစ'''(မၞိဟ်ဒိုဟ်ဓီု)'''မွဲဂကောံမွဲတၠရ၊ မၞိဟ်ဟွံဆဵုကေတ်ၚုဟ်မးကမၠောန်ဇၞော်တဴကဵုဒြဟတ်သွက်ဘဝပိုဲတံဗီုလဵုတုဲ လၞုဟ်ကမၠောန် ပဲါဟလေတ်ကမၠောန်အိုတ်တုဲ ဘဝဍေံတံဂှ်လေဝ်ဟွံမွယ်ကဵုၚုဟ်မး သီုကဵုဟွံမွယ်ကဵုဓရ်ကေုာံလျးအရံင်မၞိဟ်မွဲရ။
ပွမကၠောန်ကမၠောန်ဟီုမ္ဂးဂှ် ဖန်ဗဒှ်ကဵုစိုတ်ပိုဲဏံမ္ၚိုဟ်ကြံင်ခိုၚ်ကၟောန်လၟိုန်ရ၊ ညးလ္ၚဵုတံဂှ် ဆဵုညာတ်ကေတ်အခက်ခုဲညိညဓဝ်ဂှ်ဆုတ်ကလေင်ထောံလောဲလောဲရ၊ ဟိုတ်ဒှ်သာ်ဂှ်တုဲ ယဝ်ရပိုဲတံကေင်ကၠောန်ဒၟံင်ကမၠောန်ဂၠိုင်ဂၠိုင် ဒးစိုတ်ကမၠောန်ဆာန်ကမၠောန် ကေင်သ္ဂုတ်သွာတ်ပါ်ပဲါပစာရဏာကမၠောန်ဒၟံင်တွဵုတုဲ ပ္ဍဲကဵုအခိင်က္တဵုဒှ်ပြသၞာတှ်ေ ကၠောန်ဗဒှ်ကဵုညးတံဂွံတဴဒြဟတ်ဂဥုဲစိုတ်သွက်သ္ဂောံပြိုင်ပ္ကာန်ကဵုပြသၞာပ္ဍဲဂတမုက်တ္ၚဲဏံမာန်လောဲလောဲသွာသွာရ။
'''(၃) − ရံင်မၞိဟ်'''
ပ္ဍဲဖဵုလက္ကရဴဏံတှ်ေရံင်မၞိဟ်ညိ၊ '''ၚုဟ်မးပိုဲမၞိဟ်တံဏံဂှ်နွံဒၟံင်ပ္ဍဲကဵုကမၠောန်'''ရ၊ ပိုဲမၞိဟ်တံဏံဂှ် တၟေင်တၟဟ်နူကဵုသတ်နာနာတံဏီဏောင်ဟီုဂှ် − − − ပ္တိတ်အစောန်ကၠောန်ကမၠောန် မွဲဂကောံမွဲဂရောံမွဲစွံဂွံတဴမာန်၊ နွံကဵုပွမရီုဗင်အာညးသ္ကံ၊ တုဲပၠန် ပိုဲမၞိဟ်ဏံသိုင်ဗဒှ်ကေတ်ဓဝ်သမဂ္ဂဳညးသ္ကံမာန်ကီု ဓဝ်သမဂ္ဂဳက္တဵုဒှ်မွဲဂကောံမွဲကလောံတုဲ အရာကမၠောန်ဇြိုင်ဇြိုင်တံဂှ်လေဝ်ညံင်သ္ဂောံသာအိုတ်အောန်အာမာန်ကီု အခက်ခုဲပြသၞာဂၠိုင်ဂၠိုင်တံဂှ်ပၠန် ညံင်သ္ဂောံအောန်အိုတ်အးအာမာန်ကီု ကမၠောန်မအိင်ဒၟံင်တံဂှ်လေဝ် ညံင်သ္ဂောံမြက်တိုန်တုဲဒှ်ပြဟ်ပြဟ်မာန်ဂှ် ပိုဲမၞိဟ်ဏံမွဲသတ်ဟေင်ရ ကၠောန်ကေတ်ဂွံတက်ကျာကေတ်ဂွံလောဲလောဲရ။
'''မၞိဟ်ဗောဓိသတ်'''
'''မၞိဟ်ဟွံရီုဗင်ဆဵုညးဒှ်ဒဒိုက်တံဂှ် ဒှ်မၞိဟ်သတ်တိရစ္ဆာန်၊
မၞိဟ်ရီုဗင်ဒၟံင်ညးတၞဟ်တွဵုတံဂှ်လေဝ် ဒှ်မၞိဟ်ဗောဓိသတ်ရ၊
ဗောဓိသတ်ဟီုမ္ဂးဂှ် ဟွံတီဆဇကုမွဲဓဝ်တုဲ ဒးစိုတ်ရီုဗင်ညးတၞဟ် ဒးစိုတ်ကၠောန်ကမၠောန်တုဲ ဟွံကေတ်သ္ပမာန်လ္တူညးတၞဟ် သီုကဵုဟွံဍဵုဍိုက်လ္တူညးဂမၠိုင်ဗွဲတုန် ။
'''
ပိုဲတံထေက်ကဵုဒးတီဏောင်ဂှ် မၞိဟ်ဒးကေတ်တာလျိုင်မၞိဟ်တုဲ သွက်သ္ဂောံသၠုင်ပ္တိုန်က္ဆံင်ဂွံဒှ်အာမၞိဟ်ခိုဟ်မွဲ ဂွံဒှ်အာမၞိဟ်တၠပညာဂတာပ်အခေတ်မွဲ'''(တၠပညာအဲဟီုဏံဂှ် မၞိဟ်ကၠိုဟ်စိုတ်ဘဝဇေတ်ဇေတ်ဏောင်ဏး မၞိဟ်တၠပညာစောန်လိက်စောန်အရေဝ်ဟွံသေင်ပုဟ် လ္ပကၠိုဟ်စိုတ်ဗၠေတ်အာညိ)၊''' ယဝ်ဒှ်မၞိဟ်တၠပညာဗီုအဲဟီုဏံတုဲ မူကမၠောန်မကၠောန်ကၠောန်တှ်ေ ချပ်ခိုဟ် ဟီုခိုဟ် ကၠောန်ထ္ၜးရဴခိုဟ်အာတုဲ ဍိုက်ပေင်နွံကဵုတသိုက်စိုတ်မိပ်လဟိင် တုဲတှ်ေ '''ၚုဟ်မးပရဲဍေံဂှ်တှ်ေတိုင်ပ္ကဴ'''။
မၞိဟ်စိုတ်ဆဵုဓဝ်တီကၠိုဟ်လောဲတံဂှ် မူကမၠောန်ကၠောန်ကၠောန်လေဝ်ကၠုင်နူဓရ်၊ ယဝ်ရဓရ်ဟွံမွယ်မ္ဂးတှ်ေ ဟွံမွယ်ကဵုကမၠောန်ပွမကၠောန်ရ၊ တုဲတှ်ေ ညးတံဟွံဒးစိုတ်ကၠောန်ကမၠောန်အိုတ်တုဲ ထောံလသာလဝ်ကမၠောန်ပေင်ပြးညံၚ်ရဴဟွံသေင်ကဵုမၞိဟ်ရ၊ '''(ဓရ်အဲဟီုဒၞာဲဏံဂှ် ဒှ်ဓရ်ဗီုညးဂမၠိုင်ကၠိုဟ်စိုတ်ဟွံသေင်ပုဟ်၊ ဓရ်ဟီုဂှ် ဘဝဇေတ်ဇေတ် သဘာဝဍာံဍာံဏောင်ဏး)'''။
ပိုဲမၞိဟ်ဏံဝွံ တုပ်တဴညံင်ရဴဖါန်မွဲမကီုရ၊ ယဝ်ရပိုဲတံထောံစုတ်ဗပေင်အရာလဵုလေဝ် ဒှ်အာအရာတေံဖအိုတ်မာန်ရ၊ ပိုဲမၞိဟ်ဏံသာ်ဏံကီုတုဲ ယဝ်ရကေတ်နင်စိုတ်သ္အးသ္အးနွံကဵုဓရ် အာကေတ်နင်ဓရ်မေတ္တာစေတနာတုဲ ဒှ်အာမၞိဟ်ခိုဟ်တၟေင်ဂတာပ်အခေတ်မွဲရ၊ '''ညံၚ်ရဴဖါန်ဂှ်စတ်ဖျေံဂဥုဲဂျိဟေၚ် ဒှ်အာဖါန်ဂျိမွဲမဓဝဲါဂှ်'''ရ။
ယဝ်ရပိုဲတံရံၚ်မၞိဟ်လေပ်တုဲ ပိုဲတံဒးဆက်ဆောံတောဲဆဴဒၟံၚ်ကဵုညးဂှ်ရောပ္ဍဲကဵုကမၠောန်၊ ပိုဲထေက်ကြိုက်ဒးတီမၞိဟ်ဗီုဏံမၞိဟ်ဗီုတေံတုဲ ပိုဲဂွံကၠောန်သ္ပကဵုဍေံတံသာ်လဵုဒးတုဲ သွက်သ္ဂောံပဲါထောံပွမဒးဇီုကပိုက်ညးသ္ကံအရာမွဲမွဲပ္ဍဲအဃောကၠောန်ဒၟံင်ကမၠောန်ဂှ်ရ။
'''(ရံင်ညးတၞဟ်တုဲတှ်ေ ထေက်ကြိုက်ဒးကလေင်ရံင်ဇကုပိုဲဏံကီညိ)'''
မ္ၚးနူရံင်ညးတၞဟ်တုဲတှ်ေ ပိုဲတံဒးကလေင်ပါ်ပဲါလ္ၚတ်ရံင်ဇကုပိုဲဏံကိုညိအဴ၊ ပိုဲဏံဒးတီဟီုဂှ် ဘဝပိုဲနွံဒၟံင်ပ္ဍဲကဵုကဆံင်လဵုရော၊ ဒရံင်ဇကုပိုဲလေပ်တုဲ ပိုဲဏံဒှ်မၞိဟ်ဗီုလဵု ဟီုဂးကဵုညးတၞဟ်သာ်လဵု '''(မၞိဟ်လ္ၚဵုတံဂှ် ဟွံတီမွဲသာ်ဇကုဂှ်ဒှ်ဒၟံင်မၞိဟ်သာ်လဵုရ၊ ယတ်ရဒှ်ဒၟံင်ဗီုဏံမ္ဂးတှ်ေ အနာဂတ်ဂှ်ကြေပ်ဂြတ်တဴဏောင်)''' ။
ဟိုတ်ဒှ်သာ်ဂှ်တုဲ ယဝ်ရပိုဲရံင်ညးတၞဟ်လေပ် ရံၚ်ဇကုပိုဲဏံလေဝ်လေပ်မ္ဂးတှ်ေ ပိုဲတံရဲသၟာကမၠောန်မွဲစွံ ဆက်ဆောံကၠောံခဍညးသ္ကံခိုဟ်တဴအိုတ်တုဲ သိုန်ပ္တိုန်ကေတ်ကမၠောန်ပိုဲတံမကၠောန်ဒၟံင်တ္ၚဲဏံဂှ် ကြပ်ကၠုင်တိုင်ပ္ကဴဇၟာပ်ကျာယီုလုပ်ယီုတိတ်ရ။
'''(တီဘဝဇကုလေပ်ဂှ် ဗဂဵုလဟဵုပတိုန်ၚုဟ်မးဇကု)'''
ပိုဲရံင်ဇကုပိုဲလေပ်ဂှ် ထေက်ကြိုက်ဒးတီဇကုပိုဲဇေတ်ဇေတ်ညိ၊ ဒးတီဇကုပိုဲဘဝပိုဲဂှ်ဒှ်မၞိဟ်သာ်လဵုရောဟီုတုဲ ဒးသ္ပဇကုပိုဲဗီုလဵုညံင်သ္ဂောံဒှ်မၞိဟ်မၞုံကဵုၚုဟ်မးဂတမုက်မတ်ညးဂမၠိုင်မာန်ကီု၊ ထေက်ကြိုက်ပိုဲတံဒးဗဂဵုလဟဵုစိုတ်ပိုဲဘဝပိုဲ ဂွံဒှ်အာလက်သဏ်အပံင်(+)ပ္ဍဲလပါ်လျးအရံင်မၞိဟ်သီုကဵုဓဝ်ဍာံမွဲ။
ယဝ်ရဒးဟီုဗီုအရေဝ်အခေတ်တ္ၚဲဏံတှ်ေ သၠုင်ပတိုန်ၚုဟ်မးမၞိဟ်ပ္ဍဲကဵုဘဝပိုဲဏံမွဲရ၊ ဇၟာပ်မၞိဟ်သီုဖ္အိုတ်တံဂှ် ဒးရံင်ဘဝဇကုလေပ်တုဲ ဇကုပိုဲဘဝပိုဲစိုတ်ပိုဲဏံ မူအရာပိုတ်အိုတ်ကၠေံဒၟံင်အရာနာနာတံဂှ် ထေက်ကြိုက်ဒးဂၠာဲဗပေင်စုတ်နင်အရာတေံဂှ်အိုတ်ညိအဴ၊ ထေက်ကြိုက်မၞိဟ်မွဲဗဂဵုလဟဵုဂွံညံင်ဂွံဂတာပ်အခေတ်ဂှ်တှ်ေ ဒးဆက်ဗဂဵုလဟဵုအာသိုက်သိုက်တွဵုညိ၊ သဘာဝပိုဲမၞိဟ်ဏံဂှ် အရာတၟေင်တၟေင်ဟွံဂွံကၠောန်ဏီတံဂှ်နွံဒၟံင်ဗဝ်သအဝ်ဏီဍေံမၚ်ဒၟံင်ပိုဲလေဝ်ဟီုစဂွံမံင်၊ အရာဍေံဟွံဒှ်ဂှ် ဒှ်ဟိုတ်ပိုဲဏံကၠောန်ဟွံလေပ်ဟွံသေင်ပုဟ်၊ ဟိုတ်နူပိုဲဏံဟွံပ္တိတ်အစောန်စရာဲ ဟွံဗဂဵုလဟဵုဗီုကဵုအခိင်အခေတ်ကာလဒေသတုဲ အရာတေံဂှ်လေဝ်ပိုဲကၠောန်ဟွံဒှ်ရ။
ပိုဲမၞိဟ်တံညးဂမၠိုင်လေဝ် ညးလဵုလေဝ်ဟွံမွယ် ဘဝဂှ်ဒးဍိုက်ပေင်မံင်အလုံအိုတ်သီုရ၊ ဒၞာဲဍေံဟွံပေင်ဟွံစိုပ်တံဂှ် ဒးဗဂဵုလဟဵုကေတ်သိုက်သိုက်တုဲ ခြာဟွံလအ်ဟေင်ဒှ်ကၠုင်မၞိဟ်မၞုံကဵုၚုဟ်မးမွဲ ဍိုက်ပေင်ကဵုလျးအရံင်မၞိဟ်မွဲ ဂတမုက်မတ်ညးလောကတံမာန်လောဲလောဲရ။
'''(လ္ၚတ်မံင်တွဵု တီမံင်လၟိုန်)'''
နာဲပိုဲဗုဒ္ဓဟီုလဝ်ဂှ် ထေက်ကြိုက်ဒးလ္ၚတ်မံင်ဇကုပိုဲတွဵုညိ၊ ပ္ဍဲကဵုဒၞာဲဏံတှ်ေ ဗီုလဵုဂွံလ္ၚတ်ဗ္တောန်ဇကုပိုဲဏံဂှ်ရောတှ်ေ အရာဒးလ္ၚတ်ဗ္တောန်ဇကုပိုဲဏံခိုဟ်အိုတ်ဂှ်တှ်ေ ကမၠောန်ဟေင်ရ။
မွဲဗီုဂှ်ပၠန်တှ်ေ ဇကုပိုဲဏံဂှ် ဒးတီစဳပၞောန်ပ္ဍဲကဵုကမၠောန်ဇကုသီုကဵုညးတၞဟ်တံဂှ် ညံင်သ္ဂောံကလိတ်ကဠောတ်သောင်ၜးညးသ္ကံညိ၊ ဟွံကၠောန်ဗဒှ်ဒၟာနူဇကုညးမွဲဓဝ်တုဲကမၠောန်ဒးလီုလာ်အာအိုတ်၊ တီတဴဒၟံင်ဇကုတွဵုတုဲ ဒၞာဲလဵုအာအာမ္ဂး ဖျေံစဳပၞောန်သ္ဂုတ်သွာတ်ဘဝကဵုခိုဟ်ခိုဟ်အိုတ်ညိအဴ။
'''(ဘွမၞုံကဵုၚုဟ်မးဂှ် ဟိုတ်နူရံင်လ္ၚတ်တီကၠိုဟ်)'''
'''ယဝ်ရပိုဲကောန်ဂကူတံရံင်(၃)ရံၚ်ဏံလေပ်တုဲ ရံင်ကမၠောန် − ရံၚ်ဇကုပိုဲ − ရံင်ညးတၞဟ်လေပ်တုဲမ္ဂးတှ်ေ အဲညးချူလိက်ဏံဂံင်ကေတ်တာလျိုင်ဟီုဂှ် ဘတဏံမွဲဘဝမိပ်တဴအိုတ်အစောန်အဃောကၠောန်ကမၠောန်ရ၊'''
ယဝ်ရပိုဲတံရံင်ဇကုပိုဲလေဝ်ဟွံလေပ်ကီု ရံၚ်ညးတၞဟ်လေဝ်ဟွံဒှ်ကီု သီုကဵုရံင်ကမၠောန်လေဝ်ဟွံလေပ်တှ်ေ မူရောဒးဗဂဵုလဟဵုကဵုဘဝဇကုဂှ်ရောလေဝ်ဟွံတီ၊ ဟွံကၠိုဟ်ဆေင်စပ်ကဵုတၞဟ်တံဗီုလဵုကီုတုဲ ဟွံတီကမၠောန်ဂှ်နွံကဵုၚုဟ်မးသွက်ဘဝပိုဲမၞိဟ်တံၜိုတ်ဂလိုင်လဵုတုဲ ဣဏံဟေင်ရပိုဲတံကၠောန်ကမၠောန်ဟွံမိပ် ဟွံဒးစိုတ်ကၠောန်ကမၠောန်ဟွံဆာန်ကမၠောန်အိုတ်တုဲ ဒှ်အခက်ခုဲပြသၞာကဵုသ္ကံရဲကရောံကၠောန်ကမၠောန်မွဲစွံလောဲလောဲရ။
ဗွဲလက္ကရဴအိုတ် အဲညးချူလိက်ဏံမိက်သ္ဂောံဟီုလဴကဵုမွဲပါင်ပၠန်ဂှ်တှ်ေ ယဝ်ရမိက်သ္ဂောံကၠောန်ကမၠောန်နွံကဵုတသိုက်စိုတ် မိက်သ္ဂောံမိပ်ကဵုကမၠောန်မ္ဂးတှ်ေ ပိုဲတံဒးရံင်ကမၠောန်လေပ်ညိ၊ ဒးရံင်ဇကုပိုဲဏံလေပ်ညိ၊ ဒးရံင်ညးတၞဟ်တံလေဝ်လေပ်တှ်ေ ဘဝပိုဲဏံဂှ် ဂွံဆဵုကေတ်တိုင်ပ္ကဴ ဗီုပိုဲတိက်လ္ပအ်ညာတ်နူဗ္တံဂှ်ဨကန်တဍာံစၟတ်ရအဴ ။
'''ပိုဲမၞိဟ်ဏံဂျိုင်ဒၟံင်တ္ၚဲဏံဂှ်မူအဓိပ္ပါယ်ရော?
'''သွဟ်ဍေံဍာံစၟတ်ဗွဲသဘာဝဂှ်တှ်ေ ဂျိုင်ဒၟံင်တ္ၚဲဏံဂှ် ဒးကၠောန်ဖဵုခိုဟ်မွဲဟေၚ်ရ။''''''
'''တင်ဂုဏ်ဗွဲမလောန်ရအဴ − − − ဝိညာဏ်ထဝ် မန်ထေန်'''
Tags:
မၞိဟ်ဆာန်ကမၠောန်